Jungschar & Glühwürmli

Bisch du zwüsche 6 und 12 Johr alt, gern in dr Natur usse, wotsch Spass ha und s Zämmesii gniesse? Denn bisch du bi uns in dr Jungschi genau richtig. Mir treffe uns all zwei Wuche, meistens vo 14.00-17.00h in dr Chrischona Fünflibertal. Zämme hemer viel Spass, erkunde d Natur, lerne wie me es Biwak (Zelt us Militärblache) baut, bi strömendem Rege es Füür macht oder unternähme verschiedeni Usflüg. Jede Nomidag gits e Gschicht us dr Bible und mir singe zämme Lieder. Es feins und usgfallnigs Zvieri dörf natürlich au nid fehle. All zwei Johr findet es regionals Pfingstlager statt, wo mir mit sechs andere Jungschare us dr Region unterwägs sind. Vo Ziit zu Ziit gits au es SoLa oder es Biwak- Weekend.

Mir sin es jungs, ihgspielts und motivierts Team, wo viel und gern in die wichtigi Arbeit investiert und mit de Kids unterwegs isch. Mir setze au viel Wert druff, die ältere Jungschärler nochezieh und s Leiterteam z verstärke und uszbilde. Bisch du interessiert? Denn chum doch eifach am negschte Nomidag verbi und lueg iine. Hesch du oder dini Eltere froge? Denn meld dich doch eifach bi dr Franziska per Mail oder SMS/WhatsApp. Mir freue uns uf dich und dini Fründe und sin gspannt, was s neue Semester so mit sich bringt.

Kontaktperson
Hofer Franziska
Hammerstrasse 4
4414 Füllinsdorf
franziska.hof(at)gmail.com
076/513 23 66